වෑලි පිල්ලෙන් ගරිල්ලා පිල්ලට

 

එදා දරුවන් පන්සලේ පාසලේදී අකුරු ලියුවේ වැලි පිල්ලකය. අද ඒ ඇගිල්ලෙන්ම දරුවා ලියන්නේ පරිගණක තහඩුවක ගරිල්ලා වීදුරුවක් මතය. එදා මෙසපොතේමියානු ලේඛකයා මැටි පෙත්තක (clay tablet)ලියූ කවිය අද කවියා ලියන්නේ විද්‍යුත් පෙත්තකය (e-tablet). හෙට ලියන්නට අවශ්‍ය වන්නේම නැත. අප විසින් කළ යුතු වන්නේ අතේ ඇති පෙත්තට අප ලිවීමට අවශ්‍ය දේ කියවීම පමණය. එදාට ශාක්ෂරතාව යනුවෙන් අදහස් වන්නේ කියවීම සහ අසා සිටීම පමණක් විය හැකිය. අපි මහා වටයක් කැරකී ආපසු  මළ පොතේ අකුරක් නොදත් වාචික සමාජයක් කරා ගමන් කරමින් සිටිමු.

ඒ ගමනේ එක් හැරවුම් ලක්ෂයක් වන්නේ විද්‍යුත් ලේඛනයයි. වි-ලේඛනය ඉංග්‍රීසියෙන් බිහිවී අවුරුදු 30 කට පසු මුල්ම සිංහල ඊ නවකතාව සයිබර් අවකාශයට එකතු විය.

අපේ ඊ ලේඛකයන්ට මුල් වරට ඔවුන්ගේ නිර්මාණ බෙදා ගන්නට අවස්ථාවක් ලැබුණේ 2010 බිහි වූ pothpath.com අඩවිය හරහාය. ඉඩෝරය නිමාවිය නමින් කවි පිටුවක් අපේ කවියන් වෙනුවෙන් බිහිවිය.

අද ලංකාවේ ඊ ලේඛකයන් ගේ සමූහය ලොව සිටිනා මිලියන 15 ක් වූ සිංහලය මවුබස කරගත් පාඨකයන්ට ඊ සගරාවක් පුදන්නේ ඒ ගමනේ තවත් පියවරක් ලෙසින්ය.

සිංහල සාහිත්‍ය පිරිහී ඇතැයි ද, සිංහල කවිය සහ කෙටිකතාව විශාල පසුබෑමකට ලක්වී ඇතැයිද, නවකතාව එකතැන පල් වෙමින් ඇතැයිද අපේ සාහිත්‍ය අයිති තමන්ට යැයි සිතා සිටින කිහිප දෙනෙකුගේ මතය ඔවුන් විසින් මවා ගත් සිහිනයක් හෝ ඔවුන්ගේ කුහක කම ප්‍රදර්ශනය කරන කියමනක් බව සනාථ කළ හැකි ඉතා දක්ෂ, ඉතා ඉහළ මට්ටමක කල්පනා ශක්තියක් ඇති තරැණ නිර්මාණ කරුවන් අද අපේ සිටිනා බව ෆේස්බුක් වැනි සමාජ ජාලයන්හි නිතිපතා පළ වන නිර්මාණ හරහා අපි දකිමු.


මේ නිර්මාණ කරුවන්ට මුද්‍රිත පොත පත බිහිකර ගැනීමට ඇති අවස්ථා ඉතා සීමිතය. ඇතත් අත්තේ බොහොවිට ඔවුන් සූරා කෑම සදහාය. පළ වුවත් ඒ නිර්මාණ කියවීමට බලා සිටින පාඨකයන් රසිකයන් අත‌ෙ පත්වන්නේ නැත. අද විද්‍යුත් තාක්ෂණය මේ නව නිර්මාණ කරුවන්ට අලුත් මාවතක් විවෘත කර දී ඇත.

2014 අගෝස්තු 21 වනදා බිහිවූ ඊ ලේඛකයන්ගේ අවකාශය තුළ දින 45 කදී 588 දෙනෙක් එකතුවීම තහවුරු කරන්නේ සාහිත්‍යයේ අනාගතය ඊ පොත බවයි. නූතන කයියාම් ගේ ගී පොත බිහිවන්නේ මී විතක් ඇතිව හෝ නැතිව ඊ පොතක් ලෙස බවයි.

ප්‍රකාශකයන්ගේ පසුපස යන්නේ නැතිව, ආයොජකයන්ගේ සහ වෙළද පුචාරකයන්ගේ කොන්දේසි වලට යටත් වන්නේ නැතුව, තමන්ගේ නිර්මාණ පළ කරන්නටත්, ඒ නිර්මාණ ගැන නිදහසේ අදහස් ප්‍රකාශ කරන්නටත්, ඊ සංකලණි බිහිවන්නේය.

මුද්‍රණ යන්ත්‍ර බිහිවී පොත් මහාපරිමානයෙන් බිහිවන්නට වීම නිසා වෙළ'ද භාණ්ඩයක් වූ සාහිත්‍ය නිර්මාණය යළිත් වරක් සැබෑ කලා නිර්මාණයක් ලෙස එලි දකින්නට උදාවූ මේ අවස්ථාවෙන් අපේ සියලුම සාහිත්‍ය ලැදි රසිකයන් උපරිම ප්‍රයොජන ලබා ගනිත්වා!

 

දයා දිසානායක